Віншуем па-беларуску
Жадаю нашым маладым, каб доўга не спалі, рана ўставалі, добра працавалі, адзін аднаго кахалі і сваіх ніколі не забывалі!
Жадаю здароўя маладым у ручкі, у ножкі і пасярэдзіне трошкі!
Жадаю вам здароўя, а нам багацця!
Жадаю піць з рога, каб дзяцей было многа!
Жадаю пары маладой шчасця, долі, хлеба ўволю, золата бочку, сына і дочку, зялёнага дуба, каб жылі люба!
Жывіце добра і сумленна, і будзе мора па калена!
Жывіце заўсёды з хлебам-соллю, з шчасцем-доляй, з добрым здароўем!
Жывіце, пажывайце ды дабро нажывайце!
Век жывіце ў радасці, не адчувайце старасці!
Радасці вам поўна, і жывіце так, каб вам зайздросціў багаты і бядняк!
Жывіце стагоддзе ў міры і згодзе!
Каб дзяды не ведалі бяды, а ўнукі не бачылі мукі!
Каб вы заўсёды жылі з каханнем, бо каханне - гэта зорка, якая ніколі не гасне!
Каб добра жылося, вялося, любілася і весялілася!
Каб жылося і вялося, хацелася і маглося!
Каб ваш ложак рыпаў, рыпаў, а праз год сыночак выпаў, а праз два гадочкі выпала каб дочка!
Каб ваш ложак скрыпаў і да году сынок выпаў!
Каб твой ложак рыпаў, рыпаў, а праз год дзіця паклыпаў!
Каб доўгія гады жылі, каб здаровыя былі і на нас не забываліся!
Каб жылі, пажывалі і ніколі гора не спазналі!
Каб у нашых маладых было многа дочак і сынкоў, радасных дзянькоў, каб праўнучкаў дачакалі ды гора не зналі!
Каб вас бяда кінула ды ліха мінула!
Каб у вашым дамочку, у вашым хлявочку, у вашым садочку ўсё радзіла і пладзіла!
А каб вы здаровы былі, добра елі і пілі!
Каб быў здароў, вялікі рос і ўсім шчасця прынёс!
Каб дзеткі раслі і моцнымі былі!
Каб былі багатыя, як восень, вясёлыя, як вясна, а семяністыя, як вярба: дзе ні садзіш, — расце!
Каб жылі багата, як восень, каб былі красны, як вясна, а дужы, як вада, каб разам усё жыццё ішлі, шчасце-долю сабе знайшлі!
Каб ты быў крэпак, як вада, багаты, як зямля, вясёлы, як пчала, і красен, як вясна!
Каб былі вы багаты, як край родны, і жылі дружна, згодна, каб адзін другога шанавалі і нас, старых, не забывалі!
Каб быў здаровы, як дуб скарбовы!
Каб спадынька рана ўставала, усім есць давала і да работы не ленавала!
Каб на вашу долю бог усяго паслаў уволю!
Каб у хаце вашай было ўсяго дужа, каб гаспадарку маглі трымаць і другім дапамагаць!
Каб ніколі не хварэлі, а з кожным годам прыгажэлі!
Каб мір і згода былі ў вас, каб не было ніколі сваркі, біце на шчасце чаркі!
Каб дзеткі з унучкамі часта прыязджалі, бабку з дзедкам пацяшалі!
Каб елася, пілося і ўсё ў хляве вялося!
Каб у цябе было шмат грошай, кватэра, машына, а потым ты прачнуўся!
Каб здаровыя былі, капялюшом гарэлку пілі!
Каб былі маладыя здаровыя, як вада, багатыя, як зямля, вясёлыя, як салавейка, лёгкія, як верабейка!
Каб былі здаровымі, як зіма, прыгожымі, як вясна, рабочымі, як лета, а багатымі, як восень!
Каб пілося, елася і яшчэ хацелася!
Каб пілося, елася і яшчэ чаго іншага хацелася!
Каб былі вы багатыя, як край родны, і жылі дружна, згодна, каб адзін аднаго, як малога, шанавалі і нас, старую і старога, не забывалі.
Каб жыў сто лят і меў сто хат, залатую бочку, дванаццаць сыночкаў і адну дочку!
Каб быў у вас заўсёды лад, жывіце шчасліва, багата, каб пракурор і адвакат міналі вашу хату!
Каб нявеста была багата і спераду гарбата!
Каб у вашай маладой хаце сала кубламі вялося!
Каб вашы дзеткі, Алеські і Светкі, раслі, расцвіталі, як кветкі, усё ўмелі, усё зналі і родную мову не забывалі!